Спорттық ойындар бойынша жолдастық кездесу өтті

 

          «Балдәурен» РОСО-ның 20 жылдығына орай Орталықтар арасында спорттық ойындар бойынша жолдастық кездесу ұйымдастырылды. 2 күнге жалғасқан додаға Бурабай, Қапшағай, Шымкент және Балқаш орталықтарынан 43 спортшы қатысты. Аталмыш жарыста қатысушылар Волейбол, «Снайпер» ойыны, жүзу, дартс, шахмат, баскетбол, спорттық эстафета және арқан тарту сынды спорттық ойын түрлерінен күш сынасты. Дене шынықтыру-туристік кешені ұйытқы болған шарада қатысушылар білім күшімен де, білек күшімен де бақ сынасып, өздерін жан-жақты көрсете білді. Спорттық іс-шара бағдарламасына бекітілген әр ойын түріне қатысушылар белсене қатысып, әділ ойын көрсетіп, жеңіс шыңына ұмтылды.

Әр орталықтың үздіктері жиналған аламан бәйгеде спортшылар қызу ойын көрсетсе, жанкүйерлері тақымдарын қысып қолдау білдірді.

Тартысты дода қорытындасы бойынша жалпы командалық есепте Орталықтар арасынан Бурабай командасы I орынды,  Түркістан командасы II орынды, Балқаш командасы ІІІ орынды, Қапшағай командасы IV орынды қанжығаларына байлады. Жүлдегерлерге ақшалай сыйлық және мадақтау грамоталары табысталды. 

Барлық қатысушыларды жеңісімен құттықтай отырып, осындай іс-шаралар легі жалғасын табады деген сенімдеміз!