«Жаңа мектепке – жаңашыл ұстаз»

Жас педагогтердің әлеуметтік мәртебесін және шығармашылық потенциалын арттыру, инновациялық  белсенділіктерін дамыту, әрі қарай кәсіби шеберліктерін жетілдіруіне жағдай жасау, оларды Қазақстан Республикасының білім мекемелерінде бекіту мақсатында, «Жаңа мектепке – жаңашыл ұстаз» атты жас педагогтердің VII  Республикалық Байқауының ІІІ кезеңі Қазақстан Республикасының Оқу-ағарту министрлігінің қолдауымен «Балдәурен» РОСО» РМҚК базасында сәуір айының  14 мен 18 аралығында өтіп, өз мәресіне келіп жетті.  Аталған Байқауға республикамыздың әр облысынан, Астана, Алматы, Шымкент қалаларынан 1,2,3 орынға ие болған жеңімпаздар және Оқу-ағарту министрлігі әр ведомостволық бағынысты мемлекеттік мекемелерден шыққан жас мамандар,  жалпы 51 педагог қатысып, бақ сынасты.

Байқау барысында қазылар алқасы қатысушылардың  кәсібилігі мен жаңаша идеяларының ұсынылуларына, сабақты жаңартылған білім мазмұны бойынша өткізулеріне, оқушыға білім берудің жаңаша әдіс-тәсілдерін меңгертулеріне назар аударып, әр кезең ұпай санымен бағаланып отырды. Байқаудың үш кезеңінің қорытындысы бойынша қатысушылардың жалпы ұпай сандары анықталып, ең көп ұпай жинаған қатысушылар төмендегідей көрсеткішпен жеңімпаздар атанып,  марапатталды.